Members

18ನೇ ವಯಸ್ಸಿನಲ್ಲಿ ಶಿರಸಿ ತಾಲೂಕಿನ ನಡಗೋಡದ ಶಂಭು ಭಟ್ಟ ಮತ್ತು ರುಕ್ಮಿಣಿ ಭಟ್ಟರ ಮಗಳಾದ ನಿರ್ಮಲಾ ಹೆಗಡೆ ಅವರು 1992ರಲ್ಲಿ ಗೋಳಿಕೊಪ್ಪದ ಮಂಜುನಾಥ ಹೆಗಡೆ ಅವರ ಮನೆಗೆ ವಧುವಾಗಿ ಸೇರಿದರು. ಪಕ್ಕಾ ಗೃಹಿಣಿಯಾಗಿ ಅವರು ಮಗಳು ಪೂಜಾ ಹತ್ತನೇ ತರಗತಿಯವರೆಗೆ ತೋಟ, ಗದ್ದೆ, ಅಡಿಗೆ ಮತ್ತು ಅಡಿಕೆ ಸುಲಿಯುವಂತಹ ದಿನನಿತ್ಯದ ಗೃಹಕಾರ್ಯಗಳಲ್ಲಿ ತೊಡಗಿಕೊಂಡಿದ್ದರು.

ಮಗಳ ಶಿಕ್ಷಣ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಸಂಪೂರ್ಣ ಬೆಂಬಲ ನೀಡುತ್ತಿದ್ದ ನಿರ್ಮಲಾ ಹೆಗಡೆಯವರ ಪ್ರೋತ್ಸಾಹದಿಂದ ಪೂಜಾ ಅವರು ಭರತನಾಟ್ಯ ಪ್ರಾವೀಣ್ಯ (ವಿದ್ಯಾವಿದ್ವತ್) ಪರೀಕ್ಷೆಯಲ್ಲಿ ಅತ್ಯುತ್ತಮ ಶ್ರೇಯಾಂಕ ಪಡೆದು ಉತ್ತೀರ್ಣರಾದರು. ಇದೇ ಸಮಯದಲ್ಲಿ ತಾಯಿ–ಮಗಳು ಇಬ್ಬರೂ ಓದಿದ ಭೈರುಂಬೆ ಹೈ ಸ್ಕೂಲ್ ತನ್ನ ಸುವರ್ಣ ಮಹೋತ್ಸವವನ್ನು ಆಚರಿಸುತ್ತಿತ್ತು (2009–10).

ಈ ಸಂದರ್ಭದಲ್ಲೇ ಹಳೆಯ ವಿದ್ಯಾರ್ಥಿಗಳಿಂದ ಹೊಸ ರೀತಿಯ ಸಾಂಸ್ಕೃತಿಕ ಕಾರ್ಯಕ್ರಮ ನೀಡುವ ಉತ್ಸಾಹ ಮೂಡಿತ್ತು. ಆಗ ಗಡಿಗೆಹೊಳೆ ಗ್ರಾಮದ ವಿದ್ವಾನ್ ಶ್ರೀ ಸುಬ್ರಾಯ ಭಟ್ಟ (ಸಂಸ್ಕೃತ ಅಧ್ಯಾಪಕ ಹಾಗೂ ತಾಳಮದ್ದಳೆ ಅರ್ಥಧಾರಿಗಳು) ಅವರ ನೇತೃತ್ವದಲ್ಲಿ ನಡೆಯುತ್ತಿದ್ದ ಕಾಶ್ಯಪ ಪ್ರತಿಷ್ಠಾನ ಗಡಿಗೆಹೊಳೆ ಯಕ್ಷಗಾನ ಸಂಸ್ಥೆಯಲ್ಲಿ ನಿರ್ಮಲಾ ಹೆಗಡೆ ಸದಸ್ಯೆಯಾದರು.

ಆ ಊರಿನ ಐದು–ಆರು ಮಹಿಳೆಯರು ತಾಳಮದ್ದಳೆ ಮತ್ತು ಯಕ್ಷಗಾನ ಕಲಿಯುತ್ತಿದ್ದರು. ಅವರಲ್ಲಿ ತಮ್ಮ ಸಹೋದರಿ ವಸುಮತಿ (ಚಿಕ್ಕಪ್ಪನ ಮಗಳು) ನಿರ್ಮಲಾ ಅವರಿಗೆ “ನೀನು ಸಹ ಸೇರಿ ಕಲಿಯು” ಎಂದು ಆಹ್ವಾನಿಸಿದರು. ಆದರೆ ಗೋಳಿಕೊಪ್ಪದಿಂದ ಗಡಿಗೆಹೊಳೆ 9 ಕಿ.ಮೀ. ದೂರವಿದ್ದರಿಂದ ಅವರು ಮೊದಲ ವರ್ಷ ಹಿಂಜರಿದರು.