ಒಂದು ದಿನ ಶಿರಸಿಯ ಸಾಮ್ರಾಟ್ ಹೋಟೆಲ್ ಬಾಗಿಲಲ್ಲಿ ಒಬ್ಬ ವ್ಯಕ್ತಿ ನಿರ್ಮಲಕ್ಕ ಅವರನ್ನು ಕೇಳಿದರು
“ಯಕ್ಷಗಾನ ಕ್ಲಾಸ್ ಶಿರಸಿಯಲ್ಲಿ ಶುರು ಮಾಡ್ತಿಲ್ಲವೇ? ಇಲ್ಲದಿದ್ದರೆ ನನ್ನ ಮಗಳನ್ನು ಬೇರೆ ಎಲ್ಲೋ ಕಳಿಸ್ಬೇಕಾಗುತ್ತದೆ.”
ಇನ್ನೊಬ್ಬ ಮಹಿಳೆ ಹೇಳಿದರು –
“ಶಿರಸಿಯಲ್ಲಿ ವರ್ಷಕ್ಕೊಮ್ಮೆ ಯಕ್ಷಗಾನ ಶಿಬಿರ ನಡೆಯುತ್ತೆ, ಆದರೆ ಕಲಿತು ನೆನಪಲ್ಲಿ ಉಳಿಯೋದು ಮಹಿಳೆಯರಿಗೆ ಕಷ್ಟ. ಒಂದು ರೆಗ್ಯುಲರ್ ಕ್ಲಾಸ್ ಆರಂಭಿಸಿದರೆ ತುಂಬಾ ಒಳ್ಳೆಯದು.”
ಈ ಮಾತುಗಳನ್ನು ಕೇಳಿದಾಗ, ಸುಮಾರು ಹತ್ತು ವರ್ಷಗಳಿಂದ ಯಕ್ಷಗಾನ ಕ್ಷೇತ್ರದಲ್ಲಿ ಹೆಜ್ಜೆ ಹಾಕುತ್ತಿದ್ದ ಹಾಗೂ ಯಕ್ಷಗಾನ ಕ್ಷೇತ್ರಕ್ಕೆ ಏನಾದರೂ ಪ್ರತಿಯಾಗಿ ಕೊಡುವ ಆಸೆಯಿದ್ದ ಶ್ರೀಮತಿ ನಿರ್ಮಲಾ ಹೆಗಡೆ ಗೋಳಿಕೊಪ್ಪ ಅವರಿಗೆ “ಇದಕ್ಕೆ ಯಾಕಾಗಬಾರದು?” ಎಂಬ ಆಲೋಚನೆ ಮೂಡಿತು.
ಆದರೆ ಅದಕ್ಕೆ ಬೇಕಾದ ಎಲ್ಲಾ ರೀತಿಯ ಸಂಪನ್ಮೂಲಗಳ ಕುರಿತು ಆಲೋಚನೆ ಮಾಡಬೇಕೆಂದು ತೀರ್ಮಾನಿಸಿದರು.
ಒಮ್ಮೆ ಯಕ್ಷಗಾನ ಪ್ರಸಂಗ ಬರೆಯುವ ಪ್ರಯತ್ನದಲ್ಲಿ ಸಹಕರಿಸುತ್ತಿದ್ದ ಶ್ರಿ ಗಜಾನನ ಭಟ್ಟ ತುಳಗೇರಿ (ಯಕ್ಷಗಾನ ಭಾಗವತರು) ಅವರನ್ನು ಕೇಳಿದರು –
“ಯಕ್ಷಗಾನ ಕ್ಷೇತ್ರಕ್ಕೆ ಕೊಡುಗೆ ನೀಡಲು ಯಾವ ದಾರಿ ಸರಿಯಾಗಿರಬಹುದು?”
ಅವರು ಉತ್ತರಿಸಿದರು –
“ಶಿರಸಿಯಲ್ಲಿ ಯಕ್ಷಗಾನ ಕ್ಲಾಸ್ ಶುರುಮಾಡು.”
ಅವರಿಗೆ ನಿರ್ಮಲಾ ಹೆಗಡೆ ಹೇಳಿದರು –
“ನಾನು ಕಲಿಸುವಷ್ಟು ಪಕ್ವವಾಗಿಲ್ಲ.”
ಆಗ ಅವರು ಉತ್ತೇಜನ ನೀಡಿ ಹೇಳಿದರು –
“ನಿನಗೂ ಕಲಿಕೆಯಾಗುತ್ತದೆ, ನಿನ್ನಂತೆ ಹಲವರಿಗೆ ಕಲಿಯುವ ಮಾರ್ಗ ದೊರೆಯುತ್ತದೆ. ನಾವೆಲ್ಲ ಜೊತೆಯಿದ್ದೇವೆ, ಸಂಪನ್ಮೂಲ ವ್ಯಕ್ತಿಗಳ ಸಹಕಾರ ಪಡೆದು ಸಂಸ್ಥೆ ಪ್ರಾರಂಭ ಮಾಡೋಣ.”
ಈ ಮಾತುಗಳು ನಿರ್ಮಲಾ ಹೆಗಡೆ ಅವರಿಗೆ ಪ್ರೇರಣೆಯಾಗಿ, ಜೂನ್ 25, 2017 ರಂದು **“ಯಕ್ಷಗೆಜ್ಜೆ” ಸಂಸ್ಥೆ ಹುಟ್ಟಿ ಬಂತು.
ಹೀಗೆ ಈ ಕೇಂದ್ರದ ಹುಟ್ಟಿನ ಕಥೆಯನ್ನು ಹಂಚಿಕೊಂಡವರು – ಯಕ್ಷಗೆಜ್ಜೆ ಸಂಸ್ಥೆಯ ರೂವಾರಿ ಶ್ರೀಮತಿ ನಿರ್ಮಲಾ ಮಂಜುನಾಥ ಹೆಗಡೆ ಗೋಳಿಕೊಪ್ಪ.